करमाळा प्रतिनिधी
करमाळा मतदारसंघातील करमाळा तसेच कुर्डुवाडी आगारामधील बससेवेचे वेळापत्रक कोडमडलेले आहे. तसेच बसेसची दुरवस्था झालेली आहे. याचा प्रवाशांना नाहक त्रास होत आहे. त्यामुळे करमाळा व कुर्डुवाडी आगारास प्रत्येकी ३० नवीन बसेस देण्यात याव्यात अशी मागणी आमदार नारायण पाटील यांनी परिवहनमंत्री प्रताप सरनाईक यांच्याकडे केली आहे. यावर परिवहनमंत्री प्रताप सरनाईक यांनी सकारात्मक प्रतिसाद दिला.
दोन्ही डेपोमधील बसेस खराब असल्याने प्रवाशी, शालेय वि‌द्यार्थ्यांची गैरसोय होत आहे. सन २०२३ मध्ये करमाळा आगारामध्ये ७६ एवढ्‌या बसेस होत्या परंतु सद्यस्थितीत करमाळा आगारात ५६ बसेस असून त्यापैकी ५० बसेस मधून प्रवाश्यांची वाहतूक केली जाते. तसेच कुडूवाडी आगाराची स्थिती ही बिकट असून तेथेही बसेस आवश्यक आहेत.
करमाळा आगाराच्या बऱ्याच बस खराब व नादुरुस्त झालेल्या असून गेल्या वर्षभरामध्ये अनेक बसचा प्रवास चालू असतानाच यांत्रिक बिघाडामुळे बंद पडत आहेत.तसेच काही बसचे अपघात होऊन प्रवासी जखमी झाले आहेत.करमाळा तालुक्यास ८ वर्षापासून फक्त चार नविन बसेस करमाळा आगारास देण्यात आल्या आहेत. करमाळा व कुर्डुवाडी आगारात एस टी गाड्यांची संख्या कमी असून १५ वर्षापेक्षा जास्त कालावधी झालेल्या बसेसची संख्या ही जास्त असून त्या मोडकळीत आलेल्या आहेत. खराब बसेस मुळे अपघाताचे प्रमाण वाढलेले आहे. उक्त बसेस या मार्गावर सतत बंद पडत असल्याने प्रवाश्यांची गैरसोय होत आहे.
करमाळा व कुर्डुवाडी आगारामधील यांत्रिकी व प्रशासकीय रिक्त पदे, चालक-वाहक रिक्त पदे तसेच कुर्डुवाडी आगाराचे पुनर्बांधणी आदि मागण्या ही परिवहन मंत्री यांच्याकडे केलेल्या आहेत.
तसेच करमाळा मतदार संघातील करमाळा आगार व कुर्डूवाडी आगार मधील विविध समस्या बाबत बैठक आयोजित करावी अशी मागणी केली आहे.याबाबत लवकरच बैठक घेऊ असे आश्वासन परिवहनमंत्री यांनी दिले आहे.
करमाळा व कुईवाडी आगारात किमान ३० नविन एस. टी. बस देण्यात अशी आग्रही मागणी आमदार नारायण पाटील यांनी केली आहे.