करमाळा प्रतिनिधी
स्नेहालय न्यू इंग्लिश स्कूलमध्ये गुरुपौर्णिमा अत्यंत आनंदी आणि उत्साहपूर्ण वातावरणात पार पडली. शाळेच्या प्रांगणात सकाळपासूनच विद्यार्थ्यांमध्ये उत्सुकता होती. गुरुजनांविषयी कृतज्ञता व्यक्त करण्यासाठी विद्यार्थ्यांनी मनोगत सादर केले. त्यांच्या शब्दांतून गुरुचे स्थान, मार्गदर्शनाचे महत्त्व आणि गुरुजनांविषयी आदरभाव स्पष्टपणे जाणवला.
कार्यक्रमाचे विशेष आकर्षण ठरले ते ओम मोरे या विद्यार्थ्याने केलेली गुरुची वेशभूषा. त्याने गुरुच्या रूपातून विद्यार्थ्यांना गुरु-शिष्य परंपरेचा संदेश दिला. या सादरीकरणाने उपस्थितांमध्ये भावनिक वातावरण निर्माण झाले आणि विद्यार्थ्यांना गुरुजनांविषयी आदरभाव जागृत झाला.
मुख्याध्यापिका धनश्री दळवी यांनी विद्यार्थ्यांना मार्गदर्शन करताना गुरुजनांचे जीवनातील स्थान अधोरेखित केले. त्यांनी सांगितले की, गुरुजनांचे मार्गदर्शन हे विद्यार्थ्यांच्या जीवनाला योग्य दिशा देणारे असते. गुरुजनांचा आदर करणे आणि त्यांच्या शिकवणीचे पालन करणे हे प्रत्येक विद्यार्थ्याचे कर्तव्य आहे, असे त्यांनी स्पष्ट केले.
शाळेतील शिक्षक व विद्यार्थ्यांच्या उपस्थितीत गुरुपौर्णिमेचा सोहळा आनंदी वातावरणात संपन्न झाला. विद्यार्थ्यांनी उत्स्फूर्त सहभाग घेतला आणि गुरुजनांविषयी कृतज्ञता व्यक्त केली.
आजच्या गुरुपौर्णिमेच्या कार्यक्रमांचे सूत्रसंचालन इयत्ता तिसरीची विद्यार्थिनी काव्या खाडे व इयत्ता पाचवीची विद्यार्थिनी आराध्या गोसावी यांनी अत्यंत उत्कृष्टरीत्या पार पाडले. त्यांच्या आत्मविश्वासपूर्ण व प्रभावी सूत्रसंचालनामुळे संपूर्ण कार्यक्रमाला अधिक रंगत आली. उपस्थित शिक्षक, पालक व विद्यार्थ्यांनी त्यांच्या उत्कृष्ट सादरीकरणाचे विशेष कौतुक केले.